Esta materia pretende dar unha cobertura ámplia pero concisa das técnicas de ADN recombinante. Está pensada para graduados, investigadores doutros ámbitos que desexan introducirse nestes procedementos, e profesionais do sector biotecnolóxico. A materia comeza cunha introdución dos principios bioquímicos básicos nos que se fundamenta esta tecnoloxía. Trátase a continuación a reacción en cadea da polimerasa e a clonación molecular utilizando á bacteria Escherichia coli como hospedador, e describindo os seus plásmidos, fagos e vectores híbridos asociados. Seguidamente abórdase a construción e rastrexo de librerías xénicas e como modificar, inactivar ou expresar secuencias clonadas. Finalmente, discútese a manipulación xenética noutros organismos. Ademais, realízanse unhas sesións prácticas nas que se levan a cabo distintos procedementos de clonación e expresión de xenes que permiten aos alumnos contrastar os seus coñecementos e ser avaliados de xeito máis completo.
