Esta materia, de carácter eminentemente práctico, ten como obxectivo que o alumnado consolide as competencias necesarias para interpretar na modalidade de simultánea entre inglés e castelán. Así, espérase que ao longo do cuadrimestre o alumnado sexa capaz de:
-- Desenvolver as súas capacidades de comprensión, escoita activa, memoria, análise e síntese do discurso, reformulación, división da atención, axuste do décalage, escoita propia, adaptación, corrección e capacidade comunicativa nas linguas de traballo.
-- Aumentar a súa cultura xeral, saber documentarse e prepararse para interpretar conferencias sobre un tema determinado.
-- Interpretar con profesionalidade na modalidade de simultánea e na súa lingua A discursos de especialidade producidos orixinalmente na lingua B.
-- Interpretar con profesionalidade na modalidade de simultánea e na súa lingua B discursos de especialidade producidos orixinalmente na lingua A.
-- Reflexionar sobre deontoloxía e cuestións teóricas e prácticas relativas á profesión e aplicalas á práctica.
